但個市場空前地轉變得快，客人既習慣亦轉得快到「唔係人咁品」。
所以，要寫返少少 Update 嘅 Tips, 令大家嘅生活都容易過少少...
先講質素 － 鑽石 同 數碼產品 是兩個完全不同的概念
鑽石好多時候，係男人買來送比未來老婆 (老婆呢,就...)，而一去到話買新產品，男人都會啟動佢非常擅長嘅「高登mode」，當鑽石係好似相機或電子玩具咁研究研究研究...
我想講，相機電玩，只要係同一模型同一型號，最多分水貨行貨 － 而「貨」，係完全一樣的；
但係鑽石呢，因為鑽石係天然嘅關係，所以粒粒都係唔同嘅。
為咗得到女仔「好勁呀」的讚美，高登男神通常都會在網上學「睇 Cert」。我明白「識睇Cert」可以得到好多女仔的另眼相看，Ah-ha，甚至讚嘆，咁其實除咗 Cert 上面的資料，除咗4個C，都仲有好多 Cert 以外，無提及既資料嘅。
冇問題丫，佢會話咁學埋用放大鏡又如何？
嗱嗱嗱，兄弟，我哋作為「鑽石批發」，都唔係流嘅。學用放大鏡？你想要練到幾時，想睇到幾細緻先？學得來，都蚊訓啦。
所以話，算啦，兄弟！
唔好以為睇哂 Forum 就會變專家啦！你成個高登 （有人話比我知而家仲有「連登」、「膠登」）倒背如流，都唔會變專家。反而過份依賴高登料，係好易中伏呀！
有啲野，都係交番畀可信有良心既商家同你揀好啲。
再講價位 － 一分錢一分貨的顯淺道理
依家間間珠寶店都會成個貨 List擺上網 (最先咁做嘅，應該係綠色個間珠寶店吧)。
透明度如此高，顧客梗鍾意。個個「新客」都變「格價專家」，咩色咩淨度間間查，逐間問價...
就咁既，我地做老 Sell嘅，報價擺明就係份內事。不過，不時有人拎住人地張 Cert比我，叫我搵返一模一樣嘅石，最重點係，又要「跟返人地個價」喎 ...
「你咁滿意，點解唔直接買人地呢粒？」
我人蠢，真係唸唔明聽到忟，就試過咁樣「懶有禮」咁霸氣問返個客（心裡面當然明白咩事啦）。
點知個客人竟然仲霸氣過我，佢話：「Kate，咁你啲石，係閃啲透啲特別靚丫嘛，我梗係想買你啲啦！」
犀利，冇錯，天生慧眼！你其實原来已一早知高低！
咁點解你又覺得，我揀粒同 Cert 所述一樣規格的石，又會「特別靚」，而且係同「成本」無關嘅呢？咁即係 Cert 係唔會講得晒每粒石的高低，而你，想用「人地個價」，賣粒唔知點解「閃啲透啲特別靚」嘅石。
咁點解你唔唸下，我地雖然係樓上舖，但都係尖沙咀靚地段，交通方便到你呀！你都坐得舒服啫！
點解你唔容許我喺入靚貨，用心做事既同時，公平地反映反少少係價錢上呢？點解要咁折磨我呢？
最後講信任 － 我唔係你肚裡面條蟲
招呼客人，簡單咁講一句，我地只想好好生活，唔想日日過中秋咁猜燈謎...
一個字 － Budget
唔駛怕醜架。
有太多客人，成日都唔肯比個 Budget 我地，仲話果幾隻色果幾個淨度都 ok 云云....
通常我見到呢啲講法，就已經想送客！
點解想送客？
求其是旦輸入呢個色度淨度要求，喺我地 Database，閒閒地會有好幾百粒。
咁你直接搵得我 Kate，一定係想搵到特別靚既，而我當然有心水啦！
但我唔係你肚條蟲呀！
報靚左貴左你又嬲，以為我推你買貴野；
比抵玩既你，你又覺得我唔明白你係一個好有要求既貴賓，比呢啲垃圾級別嘅鑽石貶低左你身份...
咁玩法，真係慘過追公主呀！
買鑽石 交代返個 Budget 先
我介紹個好方法比你啦：你直接比個 Budget 我，放心交件事比我，我不特止可以搵到 Budget 內最好嘅 combination，重會撈埋資料都未出街既靚鑽石比你，一字排開比你任睇任揀！
信唔信？嗱，你係唔信又係無下句囉！
概念好簡單啦！就算你去周乜乜買，去搵哂全港既樓上舖... 到最後，你都係聽個sales 意見，睇佢肯唔肯幫你搵特別靚野，想用手上既budget買到最好既鑽石啫，係咪？
咁不如簡單啲，老實交代想搵咩價位的，大家慳返啖氣，慳返啲腳骨力啦...
===
大家如果有啲咩有關買 GIA鑽石的 Tips想我講的，歡迎留言給我。
沒有留言:
發佈留言